គយរំលឹកឱ្យម្ចាស់រថយន្តចង្កូតស្តាំគ្មានពន្ធមានស្រាប់នៅកម្ពុជារួសរាន់ទៅបង់ពន្ធត្រឹមចុងឆ្នាំ២០២២
ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជាបានព្រមានចាត់វិធានផ្លូវច្បាប់លើម្ចាស់រថយន្តចង្កូតស្តាំដែលមានស្រាប់នៅកម្ពុជាដែលមិនទាន់បានទៅបង់ពន្ធឱ្យបានមុនការកំណត់នៅចុងឆ្នាំ២០២២នេះ។
អគ្គនាយកដ្ឋានគយនិងរដ្ឋាករកម្ពុជា បានក្រើនរំលឹកជាថ្មីឱ្យមា្ចស់រថយន្តចង្កូតស្តាំគ្មានពន្ធមានស្រាប់នៅកម្ពុជាដែលបានចុះបញ្ជីរួចនៅតាមបណ្តាអង្គភាពគយរាជធានីខេត្ត រួសរាន់ទៅបង់ពន្ធឱ្យត្រឹមថ្ងៃទី៣១ ខែធ្នូ ឆ្នាំ២០២២។
ការក្រើនរំលឹកនេះធ្វើឡើងក្រោយពី អគ្គនាយកដ្ឋានគយ និងរដ្ឋាករកម្ពុជា សង្កេតឃើញថាម្ចាស់រថយន្តចង្កូតស្តាំដែលមានស្រាប់ជ្រកក្រោមស្លាកលេខផ្សេងៗមួយចំនួនមិនទាន់បានចូលមកបំពេញកាតព្វកិច្ចពន្ធ និងអាករនៅឡើយទេ។
អគ្គនាយកដ្ឋានគយ បានសង្កត់ធ្ងន់ថា បើម្ចាស់រថយន្តគ្រប់ប្រភេទនៅតែមិនទាន់ចូលខ្លួនមកបង់ពន្ធតាមការកំណត់របស់អគ្គនាយកដ្ឋានគយទៀត នោះអាជ្ញាធរនឹងបង្រ្កាបរឹបអូស ដោះជាគ្រឿងបន្លាស់ ឬកម្ទេចចោលតាមច្បាប់ និងបទប្បញ្ញត្តិជាធរមានដោយពុំមានការអនុគ្រោះឡើយ៕
